Top Stories

நியூயார்க், ஜுலை.25-  கூகுள் நிறுவனத்தின் தாய் நிறுவனமான அல்பாபெட் நிறுவனத்தின் இயக்குனர் குழுவில் ஒருவராகப் பெறுப்பேற்றுள்ளார் தமிழகத்தில் பிறந்த சுந்தர் பிச்சை. இவர் நீண்ட காலமாக கூகுள் நிறுவனத்தின் தலைமை செயல் அதிகாரியாகப் பணிபுரிந்து வருகின்றார்.

இவரின் முயற்சியால் கூகுள் நிறுவனம் வலுவான வளர்ச்சி, கூட்டுமைப்புகள் மற்றும் மிகப்பெரிய தயாரிப்பு கண்டுபிடிப்புகள் போன்றவற்றைப் பெற்றுள்ளது.  

சுந்தர் பிச்சையுடன் அல்பாபெட் நிறுவனத்தின் இயக்குநர்கள் குழுவில் சேர்ந்து பணியாற்ற போவதில் மகிழ்ச்சி அடைகின்றேன் என்று ஆல்பாபெட் நிறுவனத்தின் தலைமை செயல் அதிகாரி லார்ரி பேஜ் தமது அறிக்கையில் குறிப்பிட்டுள்ளார். 

கூகுள் நிறுவனத்தின் தலைமை செயல் அதிகாரியான சுந்தர் பிச்சை கூகுளின் தயாரிப்பு வளர்ச்சி மற்றும் தொழில்நுட்ப உத்தி மட்டும் இல்லாமல் நிறுவனத்தின் தினசரி செயல்பாடுகளையும் கவனித்து வந்தார்.

2014-ஆம் ஆண்டில் கூகுள் நிறுவனத்தின் தயாரிப்புகள் மற்றும் தளங்களின் பொறியியல் மற்றும் ஆராய்ச்சிகளை நிர்வகிக்கும் பொறுப்பைச் சுந்தர் பிச்சை ஏற்றார். கூகுள் நிறுவனத்தின் இணை நிறுவனர்களுடன் இணைந்து செயல்பட்ட சில ஆண்டுகளுக்குப் பிறகு 2015 ஆகஸ்ட் மாதம் கூகுள் நிறுவனத்தின் தலைமை செயல் அதிகாரியாகப் பொறுப்பேற்றார். 

அல்பாபெட்டின் இயக்குனர்கள் குழுவில் ஏற்கனவே லார்ரி பேஜ், செர்கி பிரின், முன்னாள் தலைமை செயல் அதிகாரி எரிக், கிளைனர் பெரிகின்ஸ்,  டியர்ன் கிரீன் ஆகியோருடன் சுந்தர் பிச்சையும் ஒரு நிர்வாக குழு உறுப்பினராக தற்போது இணைந்துள்ளார்.

 

கொழும்பு, ஜூலை.25- இலங்கையின் திரிகோணமலை மாவட்டத்தில்,  அலைகளில் சிக்கிக் கடலுக்குள் இழுத்துச் செல்லப்பட்டு மீளமுடியாமல் தண்ணீரில் உயிருக்குப் போராடிக் கொண்டிருந்த இரண்டு யானைகளை இலங்கை கடல்படை நீண்ட நேரப் போராட்டத்திற்கு பின்னர் மீட்டு கரைக்கு கொண்டு வந்து சேர்த்தது.

வீடியோ-நன்றி: Sri Lanka Navy Web Unit

கடந்த இரண்டு வாரங்களில் கடலில் சிக்கித் தவித்த யானைகளைக் கடல் படை மீட்பது இது இரண்டாவது முறையாகும். கரையோரத்திலிருந்து சுமார் ஒரு கிலோ மீட்டர் தூரத்திற்கு அப்பால் கடலில் இந்த யானைகள் தும்பிக்கையை மட்டும் தண்ணீருக்கு வெளியே நீட்டியவாறு தவித்துக் கொண்டிருந்தன.

கடல்படையைச் சேர்ந்த முக்குளிப்பு வீரர்களின் உதவியுடன் அந்த யானைகள் கயிற்றில் பிணைக்கப்பட்டது விசைப் படகுகள் மூலம் கரைக்கு இழுத்து வரப்பட்டன.

கடலில் இரண்டு யானைகள் தத்தளித்துக் கொண்டிருப்பதைக் கண்ட மீனவர்கள், அது குறித்து பாதுகாப்புத் துறைக்குத் தகவல் கொடுத்ததைத் தொடர்ந்து அப்பகுதியில் காவல் சுற்றுப் பணியில் ஈடுபட்டிருந்த கடல் படைக் கப்பல் விரைந்து வந்து மீட்புப் பணிகள் தொடங்கப்பட்டதாக அதிகாரிகள் கூறினர். 

கடந்த ஒரு வாரத்திற்கு முன்பு இதே போன்று கடலில் தத்தளித்த மற்றொரு யானையையும் கடல்படையினர் காப்பாற்றினர். திரிகோணமலை மாவட்டத்திலுள்ள வனப்பகுதியில் அதிக அளவில் இருந்து வரும் யானைகள் வாழ்கின்றன. 

கடல் பகுதியை ஒட்டிய இந்த வனத்திற்கும் கடலுக்கும் இடையே இருக்கும் மிகப்பெரிய உப்பு ஏரியை இந்த யானைகள் கடந்து செல்வது வழக்கமாகும் .அவ்வாறு கடக்கும் போது சில வேளையில் நீரோட்டத்தில் சிக்கி, அவை கடல் பகுதிக்கு செல்லப்பட்டு, அலைகளில் சிக்கி அவை கடலுக்குள் உள்நோக்கி இழுத்துச் செல்லப்பட்டு விடுகின்றன என்று அதிகாரிகள் கூறினார். 

லாகூர், ஜூலை.25- பாகிஸ்தானின் லாகூர் நகரில் மக்கள் நடமாட்டம் மிகுந்த காய்கறிச் சந்தையில் தலிபான் தீவிரவாதிகள் நடத்திய தற்கொலைத் தாக்குதலில் 28 பேர் கொல்லப்பட்டுள்ளனர். மேலும் 50க்கும் அதிகமானோர் படுகாயம் அடைந்துள்ளனர்.

கார் வெடிகுண்டு மூலம் இந்தத் தாக்குதல் நடத்தப்பட்டதாக முன்பு தகவல்கள் வெளியான போதிலும், பின்னர், தலிபானின் மோட்டார் சைக்கிள் தற்கொலைப் படையைச் சேர்ந்த நபர் இந்தத் தாக்குதலை நடத்தியதாக தெரிய வந்துள்ளது.

வெடிகுண்டு நிரப்பட்ட மோட்டார் சைக்கிளில் வந்த தற்கொலைப் பேர்வழி, காய்கறிச் சந்தையை ஒட்டியிருந்த போலீஸ் சோதனைச் சாவடி மீது மோதி வெடித்துச் சிதறியதாக சம்பவத்தை நேரில் பார்த்தவர்கள் கூறினர்.

இந்தத் தாக்குதலுக்கு தாங்களே பொறுப்பு எனக் கூறிகொண்ட தலிபான், அப்பகுதியில் அதிக அளவில் குவிக்கப்பட்டிருந்த போலீஸ்காரர்களை இலக்கு வைத்து தாங்கள் இந்தத் தாக்குதலை நடத்தியதாக தெரிவித்தது.

காபூல், ஜூலை.24- ஆப்கான் தலைநகர் காபூலில் நடத்தப்பட்ட தற்கொலைப்படை தாக்குதலில் 12 பேர் பலியாகினர். ஆப்கானிஸ்தான் தலைநகர் காபூலின் மேற்கு பகுதியில் வெடிகுண்டுகள் நிரப்பிய கார் ஒன்று வெடித்தது.

காரை ஓட்டி வந்தவர் தற்கொலைப்படை பயங்கரவாதியாக இருக்கக்கூடும் என கருதப்படுகிறது. இந்த தாக்குதலில் 22 பேர் பலியாகினர். 10 பேர் படுகாயம் அடைந்தனர். 

காயம் அடைந்தவர்கள் அனைவரும் அருகில் உள்ள மருத்துவமனையில் சிகிச்சை பெற்று வருகின்றனர். தற்கொலைப்படை தாக்குதலில் உயிரிழந்த அனைவரும் பொதுமக்கள் என்பது குறிப்பிடதக்கது.

மினி பேருந்து ஒன்றை குறிவைத்து இந்த தாக்குதல் நடத்தப்பட்டதாகவும் மினி பேருந்தில் அரசு ஊழியர்கள் பயணித்ததாகவும் சம்பவத்தை நேரில் பார்த்தவர்கள் தெரிவித்தனர். இந்த தாக்குதலுக்கு எந்த இயக்கமும் தற்போது வரை பொறுப்பேற்கவில்லை. 

யாழ், ஜூலை.24– யாழ்ப்பாணத்தில் நீதிபதி இளஞ்செல்வனுக்கு எதிராக நடத்தப்பட்ட துப்பாக்கிச் சூட்டில், அவருடைய 17 ஆண்டுகால மெய்க்காவலர் ஒருவர் கொல்லப்பட்டார். மேலும் ஒருவர் காயமடைந்தார். 

மிக அமைதியான சூழல் நிலவிவரும் தருணத்தில் நீதிபதி ஒருவருக்கு எதிராக இந்தக் கொலை முயற்சி, வட பகுதி தமிழர்களை மட்டுமல்லாது தென் பகுதி சிங்களவர்களையும் அதிர்ச்சிக்கு உள்ளாக்கியது.

வீடியோ- நன்றி: - Lankasri News

நேற்று மாலை நல்லூரில் இந்த துப்பாக்கிச் சூடு நடந்தது. நீதிபதி இளஞ்செழியனின் மெய்க்காவலரரான போலீஸ் சார்ஜண்ட் ஹேமச்சந்திரா மீது குண்டு பாய்ந்து அவர் மாண்டார். மேலும், மற்றொரு போலீஸ்காரர் படுகாயமடைந்தார். நீதிபதியை காப்பாற்றும் முயற்சியில் ஹேமச்சந்திரா உயிரிழந்ததாக தெரிகிறது.

ஏழைக் குடும்பத்தில் பிறந்த சிங்களப் போலீஸ்காரர் ஹேமச்சந்திராவுக்குப் பள்ளி செல்லும் வயதில் குழந்தைகள் உள்ளனர். யாழ்ப்பாணத்தில் அமைதியான சூழல் நிலவி வரும் நிலையில், இந்த துப்பாக்கிச் சூடு இலங்கை முழுவதும் அதிர்ச்சியை ஏற்படுத்தியது. 

யாழ், மேல் உயர் நீதிமன்ற நீதிபதியான இளஞ்செழியன், மிகக் கடுமையாக சட்டத்தைக் கடைபிடிக்கும் நீதிபதி என்று பெயர் பெற்றார். மிகவும் கண்டிப்பானவர்.  

போலீஸ்காரர் ஹேமச்சந்திராவுக்கு இறுதி அஞ்சலி செலுத்த வந்திருந்த நீதிபதி இளஞ்செழியன், துயரம் தாங்காது கதறி அழுதார். மேலும், ஹேமச்சந்திராவின் மனைவியின் காலில் விழுந்து, அவரது மரணத்திற்காக மன்னிப்புக் கேட்டுக் கொண்டார். இந்தக் காட்சி, இலங்கை வாழ் சிங்கள மக்களின் இதயங்களைக் கனக்கச் செய்வதாக அமைந்தது.

“என்னை நோக்கி வந்த தோட்டா என் மெய்க்காவலர் மீது பாய்ந்து விட்டது. என்னை மன்னியுங்கள்” என்று கண்ணீர் மல்கக் கூறி நீதிபதி இளஞ்செழியன் போலீஸ்காரரின் மனைவியின் காலில் விழுந்து வணங்கினார். இந்தச் சம்பவம் தமிழர்களையும் சிங்களவர்களையும் அதிர்ச்சிக்கும் வேதனைக்கும் உள்ளாக்கியது. 

"எத்தனையோ பாதுகாவலர்கள் இப்படி இறந்திருக்கிறார்கள். குறிப்பாக அரசியல்வாதிகளைப் பாதுகாப்பதில் பலர் உயிர் துறந்துள்ளனர். ஆனால் எந்த அரசியல்வாதிகளும் இறந்து போன தனது மெய்க்காவலர்களுக்காக வருத்தப்பட்டது இல்லை. 

ஆனால் கண்டிப்பு மிக்க நீதிபதி, இளஞ்செழியன் தன்னுடைய மெய்க்காவலரின் மரணத்திற்காகக் கதறியழுது மன்னிப்புக் கோரியது மனிதாபிமானம் சாகவில்லை என்பதை ஒரு தமிழரின் வழி நமக்கு உணர்த்தியுள்ளது" என்று சிங்கள வலைத்தளங்களில் பலர் கருத்துரைத்துள்ளனர்.  

மாஸ்கோ. ஜூலை.24- ரஷ்யாவிடம் இருந்து இந்தியா புதியவகை மிக் ரக போர் விமானங்களை வாங்குகிறது. இது தொடர்பாக, மிக் ஏர்கிராப்ட் கார்ப்பரே‌ஷன் தலைமை செயல் அதிகாரி இல்யா தாராசெங்கோ நிருபர்களிடம் பேசியுள்ளார்.

அதில், "நாங்கள் மிக் 35 ரக போர் விமானங்களை இந்தியாவுக்கு விற்பனை செய்வதில் மிகுந்த ஆர்வம் கொண்டுள்ளோம். இதற்கான டெண்டரை இந்திய விமானப்படையிடம் இருந்து பெறப்பட்டுள்ளது. 

அது தொடர்பாக தொழில் மற்றும் தொழில்நுட்ப ரீதியிலான குறிப்புகளின் அடிப்படையில் பேச்சுவார்த்தை நடத்தப்பட்டுவருகிறது. இது ஒரு புதிய வகை விமானம் என்பதால், இந்தியாவின் தேவைக்கேற்ப அதன் தயாரிப்பில் தேவையான மாற்றங்கள் செய்வோம்’’ என்று அவர் தெரிவித்தார்

இதன் தொழில்நுட்ப குறிப்புகளைப் பொறுத்தவரை, அது கிட்டத்தட்ட ஐந்தாம் தலைமுறை விமானத்தை போன்று அமையும்’’ என்று இல்யா கூறினார்.

இந்தியா கடந்த 50 ஆண்டுகளாக இந்த நிறுவனத்தின் மிக் ரக போர் விமானங்களை வாங்கி பயன்படுத்தி வருகிறது.

இந்நிலையில், இந்தியா சீனா இடையே எல்லை தகராறு காரணமாக போர் மேகங்கள் சூழ்ந்துள்ள நிலையில் ரஷ்யாவிடம் இருந்து மிக் ரக விமானங்களை இந்தியா வாங்குகிறது என்பது முக்கியத்துவம் வாய்ந்ததாக கருதப்படுகிறது. 

ஜக்கார்த்தா, ஜூலை.24- இந்தோனேசியாவில் போதைப்பொருள் கடத்தலில் ஈடுபட்ட கடத்தல்காரர்களைச் சுட்டு தள்ளுமாறு அந்நாட்டு போலீசாருக்கு அதிபர் உத்தரவு பிறப்பித்துள்ளார். 

இந்தோனேசியாவின் அதிபர் ஜோகோ விடோடோ நாட்டுக்குள் போதைப்பொருள் கொண்டு வரப்படுவதையும், அதனை கடத்துபவர்களையும் ஒடுக்குவதற்கு கடும் நடவடிக்கை எடுத்து வருகிறார்.

இந்நிலையில், அரசியல் கட்சித்தலைவர்கள் மத்தியில் அதிபர் கூறும்போது, ‘‘போதைப்பொருள் கடத்தல் விசயத்தில் உறுதியாக இருங்கள். குறிப்பாக, வெளிநாட்டில் இருந்து இந்த நாட்டுக்குள் போதைப்பொருள் கடத்தல்காரர்கள் நுழைந்தால் எச்சரிக்கையுடன் இருங்கள். அவர்கள் சிறிதளவு எதிர்ப்பு தெரிவித்தாலும், அவர்களை சுட்டு விடுங்கள்’’ என்று குறிப்பிட்டார்.

இந்தோனேசியாவில், 5 கிராம் அளவிற்கு போதைப்பொருள் கடத்தலில் ஈடுபட்டாலே, அந்த நாட்டு சட்டப்படி மரண தண்டனை விதிக்கப்படும் என்பது குறிப்பிடத்தக்கது.

இந்நிலையில், கடந்த 2 ஆண்டுகளில் மட்டும் அங்கு இலங்கைத்தமிழர் மயூரன் சுகுமாரன் உள்ளிட்ட 18 பேர் போதை பொருள் கடத்தலில் சிக்கி, மரண தண்டனை விதிக்கப்பட்டு சுட்டுக்கொல்லப்பட்டுள்ளனர் என்பது குறிப்பிடதக்கதாகும். 

 ஹராரே, ஜூலை.22- விபத்தில் சிக்கிக் காயமடைந்தவர்களைக் கூட காப்பாற்ற நினைக்காமல் கடந்து போய்க் கொண்டே இருக்கும் மனிதர்கள் மலிந்த உலகம் இது..; ஆனால், யானைக் குட்டி ஒன்று காரில் அடிபட்டுத் தவித்த போது சக யானைகள் அலறித் துடித்து தவித்த தவிப்பு காண்போரின் கண்களில் கண்ணீரை வரவழைத்தது.

ஜிம்பாப்வே நாட்டில் காரில் அடிபட்டு சாலையோரத்தில் குட்டி யானை ஒன்று உயிருக்குப் போராடிய சம்பவம் நடந்தது. இந்தக் காட்சிக் கொண்ட காணொளி ஒன்று சமூக வலைத் தளங்களில் வெளியாகி ஏராளமானோரின் மனங்களை நெகிழ வைத்தது.

ஜிம்பாப்வேயிலுள்ள ஹவாங்கே தேசிய வனவியல் பூங்கா பகுதியில் இந்தத் துயரச் சம்பவம் நடந்தது. சாலையில் அதிவேகத்தில் வந்த கார் ஒன்று யானைக் குட்டியை மோதித் தள்ளியது. கடுமையாக காயமடைந்த குட்டியைக் காப்பாற்ற தாய் யானையும் சக யானைகளும் கடுமையாக போராடின.

இந்தச் சம்பவத்தை நேரில் கண்ட ஹெய்டி என்ற ஜெர்மனியைச் சேர்ந்த பெண்மணி ஒருவர், அதனைத் தன்னுடைய கேமிராவில் பதிவு செய்து பின்னர் தனது முகநூலில் பதிவேற்றம் செய்தார்.

இது குறித்து அவர் அளித்த பேட்டி ஒன்றையும் அளித்துள்ளார். அதில் அவர் கூறியிருப்பதாவது:

வனவிலங்குப் பூங்காவில் நான் வலம் வந்து கொண்டிருந்த போது, தன்னை வேகமாக கடந்து சென்ற கார் ஒன்று, குட்டி யானை மீது வேகமாக மோதி விட்டு சென்று விட்டது.

அப்போது அடிபட்ட குட்டி யானையைக் காப்பாற்ற தாய் யானையும், தந்தை யானையும் அலறித் துடித்து போராடின. இதைக் கண்ட பிற யானைகளும் அங்கே திரண்டன. பாதிக்கப்பட்ட குட்டிக்கு உதவுவதற்கு தோழமையுடன் உதவ முனைந்தன.

எல்லா யானைகளுமே இந்தச் சம்பவத்தால் மிகுந்த கோபம் கொண்டிருந்தன. நான் தொலைவில் இருந்தவாறு அந்தச் சோக காட்சியை படமெடுத்தேன்.

யானைகளின் அலறலும் அடிபட்டுக் கீழே கிடந்த குட்டியைத் தூக்கி நிறுத்த தாய் யானையும் இதர யானைகளும் துடித்த விதமும் என் கண்களில் கண்ணீரை வழிய விட்டன. அழுதவாறு தான் அந்தக் காட்சியை படம் பிடித்தேன்.

மனிதர்களை விட யானைகள் கொண்டிருக்கும் பந்தத்தையும் பாசத்தையும் இங்குதான் நான் முதன் முறையாக கண்டேன். இவ்வாறு ஹெய்டி தன்னுடைய பேட்டியில் கூறினார்.

 ஜெனீவா, ஜூலை.21- சுமார் 75 ஆண்டுகளுக்கு முன் காணாமல் போன தம்பதியரின் உடல்கள், சுவிட்சர்லாந்தில் உள்ள பனிமலையில் கடந்த வாரம் கண்டெடுக்கப்பட்டது.

1942-ஆம் ஆண்டு, சுவிட்சர்லாந்தில் உள்ள ஆல்ப்ஸ் மலைத்தொடரின் ‘வாலைஸ் கண்டோ’ என்ற பகுதிக்கு மார்செலின் -பிரான்சின்’ என்ற தம்பதியினர், மாடு மேய்ப்பதற்காக சென்றுள்ளனர். அதன் பின்னர் அவர்கள் காணாமல் போய்விட்டனர். அவர்களுக்கு 7 பிள்ளைகள். 

தற்போது இவர்களின் சடலங்கள் பனியில் அப்படியே பதப்பட்ட நிலையிலேயே கிடைத்துள்ளதால், பனிப்புயலில் சிக்கி அவர்கள் பலியாகியிருக்கக் கூடும் என்று நம்பப்படுகிறது. இந்த இடம் கடல்மட்டத்தில் இருந்து 8,500 அடிக்கு மேல் உள்ளது. 

ஆல்ப்ஸ் மலைத்தொடர் முழுவதும் பனி மூடிய பிரதேசமாகும். வெப்பநிலை மாற்றத்தின் காரணமாக, அங்கிருந்த பனியாறுகள் தற்போது வற்றியுள்ளன..

இந்நிலையில் அங்குள்ள சுற்றுலா விடுதியின் ஊழியர்கள் உறைந்த பனி ஆற்றுப்பகுதியில் மீது நடந்து செல்லும்போது, அங்கு கண்ணாடி பாட்டில்களையும், ஷூக்களையும் கண்டெடுத்தனர். உடனே அதன் அருகே சென்று, அந்த இடத்தில் தோண்டிப் பார்த்தனர். அப்போது அங்கு இரு சடலங்கள் புதையுண்டிருப்பதைக் கண்டு வெளியே எடுத்தனர். தகவலறிந்து போலீசார் சம்பவம் இடத்துக்கு விரைந்தனர்.

இந்நிலையில், இது குறித்த தகவல்கள் பரவியதும் சடலமாக கிடந்த தம்பதியினரின் வாரிசுகள், அங்கு வந்து அடையாளம் கண்டு  உறுதிப்படுத்தினர். மேலும், சடலம் இருந்த இடத்தில் புத்தகங்கள், வாட்சுகள் ஆகியவை கண்டெடுக்கப்பட்டு அவற்றை தடயவியல் துறைக்கு அனுப்பியுள்ளதாகவும் போலீசார் தெரிவித்தனர். 

இதுகுறித்து அவர்களது பிள்ளைகள் கூறுகையில், "எங்கள் பெற்றோரை தேடியே எங்கள் வாழ்நாளை கழித்துவிட்டோம். இவர்களின் சடலங்கள் சிதைந்து போகாமல், நல்ல நிலையில் பாதுகாப்பாக இருப்பதாக அதிகாரிகள் தெரிவித்தனர். இதனால், அவர்களுக்கு இறுதிச் சடங்குகள் உரிய முறையில் செய்யப்படும்ரென்று கூறினர் இதன் மூலம் 75 ஆண்டுகால தேடுதலுக்கு முடிவுக்கு வந்துள்ளது.

 

 

கெய்ரோ, ஜுலை.21- எகிப்தில் இருந்து வறுமையின் காரணமாக லிபியாவிற்கு வேலை தேடிச் சென்ற 22 பேர் பாலைவனத்தில் சிக்கி உணவு, தண்ணீரின்றி தவித்து உயிரிழந்துள்ளனர்.

எகிப்து நாட்டுத் தலைநகர் கெய்ரோ அருகே இருக்கும் மினியா என்ற கிராமத்தைச் சேர்ந்த பல குடும்பங்கள்ம் வறுமையின் பிடியில் சிக்கி அல்லல்பட்டு வருகின்றன.

விலைவாசி உயர்வு, வேலையில்லாத் திண்டாட்டம். வறுமை  வாட்டியதால் வேலைதேடி லிபியாவிற்கு சென்ற இந்தக் கிராமத்தைச் சேர்ந்த 22 பேர் பாலைவனத்தில் உணவு, தண்ணீரின்றி சிக்கி பரிதாபமாக உயிரிழந்தனர்.

இடைத் தரகர்களை நம்பி இவர்கள் வேலைக்குச் சென்றபோது இந்த விபரீதம் ஏற்பட்டுள்ளது. இதனிடையே, வேலை தேடி சட்டவிரோதமாக லிபியாவிற்குள் நுழைந்த குற்றச்சாட்டின் பேரில்  எகிப்தியர்கள் பலர் கைது செய்யப்பட்டுள்ளனர்.

இதனால், இந்தக் கிராமத்தைச் சேர்ந்த மக்கள் செய்வதறியாது தவித்து வருகின்றனர். இதுகுறித்து லிபியாவில் கைது செய்யப்பட்ட ஒருவரின் தாயான நபிலா ஹசிப் கூறியதாவது:

"படிப்பிற்கு தேவையான பணத்தைப் பெற எனது மகன் லிபியா செல்ல வேண்டும் என்று கூறினான். ஆனால் படிக்க வேண்டாம் என்று கூறி இங்கேயே இருக்க வலியுறுத்தினேன். ஆனால், படிப்பதற்கு பணம் வேண்டும் என்று கூறி அங்கே சென்றான். தற்போது அங்கே அவன் கைது செய்யப்பட்டுள்ளான். எனது மகன் உயிருடன் வேண்டும். எனது மகனை நினைத்து கடந்த 10 மாதங்களாக மிகவும் வேதனையுடன் அடைந்துள்ளேன்" என்றார்.

எகிப்தில் வேலையில்லா திண்டாட்டம் அதிகரித்துள்ள வேளையில், விலைவாசியும் உயர்ந்துள்ளதாக மக்கள் கூறுகின்றனர். ஆனால் இதை மறுத்துள்ள அரசு, எகிப்தில் 12 விழுக்காடு மக்களுக்கே வேலையில்லை என்று கூறி வருகின்றது. இப்பிரச்னையை தீர்க்க உரிய நடவடிக்கை எடுக்கப்படும் என்று உறுதியளித்துள்ளது.

 

இஸ்தான்புல், ஜூலை.21– துருக்கியின் கிழக்குக் கடலோரப் பகுதியைத் தாக்கிய சக்திவாய்ந்த நிலநடுக்கத்தின் காரணமாக, சுனாமி எச்சரிக்கை விடுக்கப்பட்டதோடு மக்களிடையே கடும் பீதி பரவியிருக்கிறது.

நிலநடுக்கம் தாக்கியதை அடுத்து மத்திய தரைக்கடல் பகுதியில் சுனாமி அலைகள் எழுந்துள்ளன. துருக்கி கடற்பகுதியில் தாக்கிய நிலநடுக்கத்தால் சுனாமி எழுந்ததால், இங்குள்ள முக்கிய சுற்றுலாத் தலங்களில் குவிந்திருந்த மக்கள் பாதிக்கப்பட்டடிருக்கலாம் என்ற அச்சம் பரவுயுள்ளது.  

கடற்கரை ஒட்டியுள்ள பெருவாரியான தங்கும் விடுதிகள், சுனாமி காரணம் சுற்றுலாப் பயணிகளை வலுக்கட்டாயமாக வெளியேற்றி வருவதாக தகவல் வெளியாகியுள்ளன. 

பல பிரபல தங்கும் விடுதிகளில் சுவர்களில் நிலநடுக்கத்தால் விரிசல்கள் ஏற்பட்டுள்ளன. கடற்கரையில் இருந்து சுற்றுலாப் பயணிகளை உடனடியாக அங்கிருந்து வெளியேறுபடி அறிவுறுத்தியுள்ளனர்.

இரண்டு மணி நேரத்தில் அந்தப் பகுதியில் 5 முறை நில அதிர்வு ஏற்பட்டதாக கூறப்படுகிறது. நிலநடுக்கம் மற்றும் சுனாமியால் உயிருடற்சேதங்கள் குறித்து இதுவரை எந்த தகவலும் இல்லை. 

பெர்லின், ஜூலை.21- மெர்சிடிஸ் பென்ஸ் கார் நிறுவனம், கடந்த ஆறு ஆண்டுகளில் விற்பனை செய்த அனைத்து கார்களையும் திரும்பப் பெறப்போவதாக அறிவித்துள்ளது. இதற்கான காரணம் என்ன தெரியுமா?

மெர்சிடிஸ் பென்ஸ் நிறுவனம் விற்பனை செய்த அனைத்து டீசல் மோடல் கார்களின் புகை உமிழ் முறையை மேம்படுத்துவதற்காக திரும்பப் பெறுவதாக அறிவித்துள்ளது.

வாகனங்களைத் தயாரிக்கும் ஜெர்மனியைச் சேர்ந்த டையம்லெர், இந்த நடவடிக்கை மூலம் நைட்ரஜன் ஆக்சைடு வெளியேறுவதைக் குறைக்கும் நோக்கில் மேற்கொள்ளப்படுகிறது. இதைச் செய்து முடிக்க மொத்தம் 220 மில்லியன் பவுண்ட் தேவைப்படுகிறது.

எனினும், இந்தக் குறைப்பாட்டினால் எத்தனை கார் உரிமையாளர்கள் பாதிக்கப்பட்டுள்ளனர் என்ற விவரம் வெளியிடப்படவில்லை.

ஜெர்மனியில் மட்டும் 10 லட்சம் வாகனங்களும், ஐரோப்பாவில் 20 லட்சம் வாகனங்களும் பாதிக்கப்பட்டுள்ளதாக தெரிவிக்கப்பட்டுள்ளது. கடந்த ஆண்டு லண்டனில் மட்டும் 170,000 புதிய மெர்சிடிஸ் பென்ஸ் கார்கள் பதிவு செய்யப்பட்டுள்ளன.

Advertisement